Вершы пра каханне. Лекі для каханай

Вершы пра каханне. Лекі для каханай

 

                                                                                                      Аляксей Якімовіч

Лекі для каханай

 

На зялёным лузе

                                                                Кветка адцвітае.

                                                                Маладая прыгажуня

                                                                Хлопца пакідае.

 

                                                                Цалаваць не хоча,

                                                                Кажа, што стамілася,

                                                                Што яе галоўка

                                                                Баліць, закружылася.

 

                                                                Хлопец у аптэцы

                                                                Дзверы адчыняе,

                                                                Для сваёй каханай

                                                                Лекі выбірае.

 

                                                                Паклаў іх у торбу,

                                                                Ледзь данёс да хаты,

                                                                Моргае вачыма,

                                                                Быццам вінаваты.

 

                                                                Адвярнулася дзяўчына,

                                                                Лекі не забрала,

                                                                У садок дзіцячы

                                                                Юнака паслала.

 

                                                                Сонца ярка свеціць.

                                                                Дзень стаіць гарачы.

                                                                Ідзе хлопец невясёлы

                                                                У садок дзіцячы.

                                                                                          2023 год.

 

                                                                                                Аляксей Якімовіч

Пан Бог стварыў

 

Цябе стварыў пан Бог.

                                                          Даў прыгажосць, натхненне.

                                                          Гляджу я на цябе –

                                                          У палон бярэ здзіўленне.

 

                                                          Ты можаш быць каханай

                                                          І разам з тым матуляй.

                                                          Каб убачыш дарагіх,

                                                          Ляціш да іх, як куля.

 

                                                           Ты свеціш, нібы сонейка,

                                                           Хмурынкі праганяеш,

                                                           Вясну – пару дзівосную –

                                                           Для многіх ты ствараеш.

 

                                                           Будзь умелай і прывабнай,

                                                           Па-добраму здзіўляй,

                                                           З бадзёрасцю, імкненнем

                                                           Дзянёчкі сустракай.

 

                                                           Хвілінка за хвілінкай

                                                           Між намі прабягае.

                                                           Мой яблычак мядовы

                                                           Даўно цябе чакае.

                                                                                      2023 год

 

                                                                                                   Аляксей Якімовіч

Не цалуй…

 

Не цалуй ты мяне, не цалуй:

                                                      Адплыло з жураўлямі каханне.

                                                      Не цалуй ты мяне, не цалуй.

                                                      Не патрэбна тваё мне прызнанне.

 

                                                      Жураўлі над палямі ляцяць,

                                                      Родны кут чарадой пакідаюць,

                                                      Ад халоднай, сцюдзёнай зімы,

                                                      Пракурлыкаўшы нам, уцякаюць.

 

                                                      Не цалуй ты мяне, не цалуй,

                                                      Не шукай пачуцця і жадання.

                                                      На душы, як лядок, халадок.

                                                      Адплыло з жураўлямі каханне.

 

                                                      Восень срэбныя ніткі прадзе,

                                                      Залатыя лісты растрасае,

                                                      Усе сляды, што пакінулі мы,

                                                      Каб не ўбачыў ніхто, засыпае.

 

                                                      Я таксама хачу паляцець

                                                      З жураўлямі далёка-далёка.

                                                      Пачакайце мяне, жураўлі,

                                                      Не ляціце, прашу вас, высока.

 

                                                      Не цалуй ты мяне, не цалуй,

                                                      Не шукай пачуцця і жадання.

                                                      На душы, як лядок, халадок.

                                                      Гэта наша з табой развітанне.

                                                                                         2023 год

 

                                                                                              Аляксей Якімовіч

Ідзе дожджык

 

Ідзе, ідзе дожджык,

                                                             Зямлю палівае.

                                                             Траўка зелянее,

                                                             Дружна падрастае.

 

                                                             Ідзе, ідзе дожджык,

                                                             Зямлю палівае.

                                                             Маладзіцу-прыгажуню

                                                             З хаты не пускае.

 

                                                             Ідзе, ідзе дожджык,

                                                             Зямлю палівае.

                                                             Хлопец невясёлы

                                                             Ў акно пазірае.

 

                                                             Ідзе, ідзе дожджык,

                                                             Зямлю палівае.

                                                             Уздыхае хлопец,

                                                             Мілую чакае.

 

                                                             Не пускае яе дожджык,

                                                             Дзеткі не пускаюць,

                                                             Залатою нітачкай

                                                              Звязваюць, трымаюць.

 

                                                              Нітачка не рвецца,

                                                              Нітачка яднае,

                                                              Дожджыку, што льецца,

                                                              Вельмі памагае.

 

                                                              Ідзе, ідзе дожджык,

                                                              Зямлю палівае.

                                                              Каля хаты сцежка

                                                              Травой зарастае.

 

                                                              Цякуць ручайкамі

                                                              Срэбныя дажджынкі.

                                                              На душы у хлопца

                                                              Мутныя слязінкі.

                                                                                       2023 год

 

                                                                                                       Аляксей Якімовіч

Разышоўся вецер                          

 

                                                            Разышоўся вецер,                      

                                                            Ляціць, завывае,            

                                                            У садочку вішаньку

                                                            Да зямлі згінае.

 

                                                             Разышоўся вецер,

                                                             Ляціць, завывае.

                                                             Маладзіцу-прыгажуню

                                                             З хаты не пускае.

 

                                                             Разышоўся вецер,

                                                             Ляціць завывае.

                                                             Хлопец невясёлы

                                                             Ў акно пазірае.

 

                                                             Разышоўся вецер,

                                                             Ляціць, завывае.

                                                             Уздыхае хлопец,

                                                             Мілую чакае.

 

                                                             Не пускае яе вецер,

                                                             Дзеткі не пускаюць,

                                                             Залатою нітачкай

                                                             Звязваюць, трымаюць.

 

 Нітачка не рвецца,

 Нітачка яднае,

 Ветру, што нясецца,

 Вельмі памагае.

 

 Разышоўся вецер,

 Ляціць, завывае.

 Каля хаты сцежка

 Травой зарастае.

 

 Хмаркі рассыпаюць

 Срэбныя дажджынкі.

 На душы у хлопца

 Мутныя слязінкі.

                    2024 год

 

                                                                                            Аляксей Якімовіч

Працягні мне руку

 

Вясна наступіла.

                                                         Вішня расцвітае,

                                                         Белыя пялёсткі

                                                         З ветрам растрасае.

 

                                                         Вішанька-дзяўчынка,

                                                         Цешуся табою.

                                                         Працягні мне руку,

                                                         Будзь побач са мною.

                                                        

                                                         Дзень стаіць гарачы:

                                                         Лета завітала.

                                                         Вішня маладая

                                                         Кучаравай стала.

 

                                                         Вішанька-дзяўчынка,

                                                         Салоўка спявае,

                                                         Пра салодкае спатканне

                                                         Песню нам складае.

 

                                                         Восень надыходзіць,

                                                         Па зямлі ступае.

                                                         Залаты лісточак

                                                         Вішню пакідае.

 

                                                         Вішанька-дзяўчынка,

                                                         У сне з табой лятаю,

                                                         Да шчакі тулюся,

                                                         За стан абнімаю.

 

                                                         Зіма гаспадарыць.

                                                         Сняжынкі гуляюць,

                                                         Зямлю каля вішні

                                                         Коўдрай засцілаюць.

 

                                                         Вішанька-дзяўчынка,

                                                         Не ўцякай, будзь блізка,

                                                         Працягні мне руку,

                                                         Падтрымай, бо слізка.

 

                                                        Слаўная дзяўчына,

                                                        У цябе закахаўся.

                                                        Пасвятлела на душы,

                                                        Як табе прызнаўся.

                                                                                 2024 год