Птушыныя прыпеўкі

 

Птушыныя прыпеўкі

                                                                                         Аляксей Якімовіч

А я, качка маладая,

                                                         Пакахала салаўя.

                                                         Да яго не падпускае

                                                         Мяне мамачка мая.

 

                                                         А я, качка маладая,

                                                         Плыву хутка па вадзе.

                                                         Вечарамі не гуляю.

                                                         У сваім сяджу гняздзе.

 

                                                        Певень да мяне прыйшоў

                                                        І на беразе стаіць:

                                                        Пер’е залатое

                                                        Баіцца памачыць.

 

                                                        Сяброўкі ў вырай паляцелі.

                                                        Шлях іх ліст пазалаціў.

                                                        А я дома засталася:

                                                        Мяне певень не пусціў.

 

                                                        Певень з качкаю сябруе,

                                                        Носіць ёй зярняткі.

                                                        Не сцярпелі куры:

                                                        Праганяюць з хаткі.

 

                                                        Качка аблянілася,

                                                        Працаваць не хоча.

                                                        З маладой сарокай

                                                        Цэлы дзень стракоча.

 

                                                        Сядзяць гусі ў класе,

                                                        А качка праспала:

                                                        Да паўночы з пеўнем

                                                        Яна танцавала.

 

                                                        Гусяняты каля мамы

                                                        Грэліся, сядзелі.

                                                        А як крыху падраслі,

                                                        У вырай паляцелі.

 

                                                        Сядзіць у куточку,

                                                        Плача гусянятка.

                                                        Цэлы месяц не прыходзіць,

                                                        Заблудзіўся татка.

 

                                                        Не ляціць гусак дамоў,

                                                        Хоць сям’я чакае:

                                                        З птушкамі заморскімі

                                                        На пляжы загарае.

                                                                                 2022 год.